Steven Dalli
Biografija
Steven twieled f’Ħaż-Żabbar fl-1987. Meta kien tifel żgħir, kien espost għad-dinja tal-arti peress li missieru kien pittur. Beda jattendi għal klassijiet tar-reċtar f’Masquerade Drama School u fid-Drama Unit. Eventwalment, huwa żviluppa interess fil-films, b’mod partikolari fl-editjar u fid-direzzjoni. Ta’ 19-il sena kien wieħed mid-diretturi u edituri ta’ Gizelle, drama li rebħet diversi premji fil-Malta TV Awards; din rebħet ukoll premju għall-aħjar tim, l-Aħjar Editjar u l-Aħjar Direzzjoni. Krediti oħra ta’ direzzjoni marru għall-“Evanġelisti”, il-“Klikka” u “Iċ-Ċaqqufa”. Aktar tard beda jaħdem fuq il-produzzjoni tiegħu stess bl-isem ta’ Xablott, filwaqt li kien jaħdem għal stazzjon tat-TV privat.
Fl-2013 ingħaqad ma’ Justin Farrugia, u fforma kumpanija tal-midja, bl-isem ta’ Sharp Shoot Media Ltd. Il-kumpanija kisbet reputazzjoni ta’ kwalità u professjonalità bla preċedent bil-proġett tal-bidu tagħha “Rajt ma Rajtx”, li rċieva ħafna tifħir mill-pubbliku ġenerali. Fl-2015, il-kumpanija pproduċiet is-serje tat-TV tagħha stess bl-isem ta’ “Strada Stretta”; bid-direzzjoni ta’ Steven u Justin, u saret sensazzjoni nazzjonali b’aktar minn 120,000 telespettatur (skont l-istħarriġ tal-Media Warehouse) u madwar 80,000 online on demand. Is-serje “Strada Stretta” kisbet rekord ta’ 8 premjijiet fil-Malta TV Awards 2017; fosthom l-Aqwa Dramm, l-Aqwa Direzzjoni, il-Premju tal-Għażla tan-Nies – L-Aqwa Programm tat-TV, u l-Aqwa Editjar. Fl-2018, Steven idderieġa u pproduċa “L-Għarusa” fuq TVM, dramm ambjentat f’perjodu fil-passat li kien ukoll l-aktar sensiela televiżiva li ġiet segwita f’Malta matul il-perjodu ta’ xandir tiegħu. Din is-sensiela rebħet l-Aqwa Dramm fl-ewwel Malta Film Awards li qatt sar.
Fl-2020, Steven ipproduċa l-linja ta’ “God’s Soldiers”, serje dokumentarja mmexxija minn dramm prodott minn Urban Canyons. Il-proġett qed jixxandar fuq stazzjonijiet differenti madwar l-Ewropa u l-Amerika. Steven ipproduċa u dderieġa wkoll dramm ambjentat f’perjodu fil-passat bl-isem “Chalet”; l-ewwel dramm Go Original li ħareġ għall-ewwel darba fuq GO Stars f’Diċembru 2021.
Huwa ħadem ukoll bħala attur f’diversi sensiliet televiżivi lokali. Steven studja wkoll l-Istorja fl-Università ta’ Malta.