IL-QFIL U L-ĦELSIEN SKONT MANWEL DIMECH

Wieħed jista’ jgħid li l-vera sejħa ta’ Manwel Dimech kienet waħda: li jeħles lill-poplu Malti mill-oppressjoni, l-injoranza u l-biżà.

Il-ħelsien mill-Knisja u l-ħakma kolonjali kienet tfisser li l-poplu jinħeles minn ħajja mgħixa fil-ħakma tas-superstizzjoni u l-biża’ minn dik l-istess istituzzjoni li suppost kellha tħares fuqu. Il-Qfil u l-Ħelsien Skont Manwel Dimech huwa proġett mużiko-teatrali mfassal apposta biex joffri interprezzjoni minn għajnejn l-attivist kuraġġuż li witta t-triq tal-ħelsien b’għarfien, ħsieb u perseveranza.

B’kitba u direzzjoni ta’ Victor Jacono u b’kompożizzjoni u direzzjoni mużikali ta’ Kris Spiteri, din il-produzzjoni eċitanti se tittella’ fil-Ħabs Militari l-Qadim ta’ Kordin. Qumu u semmgħu leħinkom magħna f’Diċembru li ġej, sabiex naraw lil Dimech jirbaħ fuq il-faqar u l-illiteriżmu u jsir l-eroj li miegħu se ningħaqdu biex niċċelebraw il-mitt sena minn mewtu. Il-veru ħabs mhu xejn ħlief il-biżà nnifisha.