Alice fl-Art bla Meravilji

Ta' Franca Rame

Ħin
TBA
Data
Ongoing
Post
Varji

‘Alice fl-Art bla Meravilji’ huwa Pakkett ta’ Teatru DIY, inizjalment magħmul għall-Festival Żigużajg 2020. Wara s-suċċess tal-proġett u r-rispons pożittiv li rċevejna minn organizzazzjonijiet, attivisti, ġurnalisti, akkademiċi u l-pubbliku inġenerali, kien ovvju li jkun xieraq li l-ħajja ta’ Alice timraħ lil hinn mil-limiti tal-kaxxa ċkejkna tagħha. Alice fl-Art bla Meravilji biħsiebha tkompli taqdi l-iskop tagħha: li teduka u tinforma lill-udjenzi permezz tal-arti tat-teatru.

Il-proġett huwa adattament tal-monologu oriġinali ta’ Franca Rame u Dario Fo, ‘Alice nel Paese senza Meraviglie’ u huwa essenzjalment pakkett ta’ Teatru DIY ispirat mill-ideali tas-soċjetà – riflessjoni tal-mod kif is-soċjetà tqiegħed lin-nisa f’kaxxi eżatt bħal pupi. Sabiex jiġi trattat suġġett daqstant topiku, ġie deċiż li l-istorja tiġi trasformata f’pupa ta’ veru, ippakkjata flimkien ma’ sett ta’ struzzjonijiet biex dawk li jużawha jkunu jafu xi jridu jagħmlu eżattament. ‘Alice fl-Art bla Meravilji’ bħalissa hija disponibbli kemm bil-Malti kif ukoll bl-Ingliż. B’rabta ma’ dan il-proġett, Teatru Malta qaleb ukoll wieħed u għoxrin monologi ta’ Franca Rame għall-Malti mal-Professur Simone Galea u Dr Marco Galea.

FILMAT:  Jekk int istituzzjoni, organizzazzjoni jew edukatur li qed tfittex aktar informazzjoni dwar ‘Alice fl-Art bla Meravilji,’ nistednuk tara d-dokumentarju qasir tagħna dwar kif issir il-biċċa Teatru DIY hawn jew taqra l-intervista sħiħa fuq Metal Magazine mad-direttur Sean Buhagiar hawn.

‘Alice fl-Art bla Meravilji’ ta’ Teatru Malta saret possibbli permezz ta’ kollaborazzjoni mal-Festival ŻiguŻajg u bl-appoġġ tal-Istitut Kulturali Taljan, il-Ministeru għall-Ġustizzja, Ugwaljanza u Governanza, is-Segretarjat Parlamentari għall-Ugwaljanza u r-Riformi, u l-Kunsill Malti għall-Arti.

Tim tal-Produzzjoni

Tfassil u Direzzjoni Sean Buhagiar

Kompożizzjoni Mużikali Alexandra Alden

Disinn tal-Produzzjoni | Artista tal-Filmati Francesca Mercieca

Kant | Vuċi Mariele Zammit

Konsulenza tad-Dramaterapija Lou Ghirlando

Kreazzjoni tal-Pupa Kyle Fenech

Traduzzjoni għall-Malti Marco Galea, Simone Galea

Traduzzjoni għall-Ingliż Simon Bartolo

Qarrej tal-Provi Simon Bartolo

KIF TORDNA L-PUPA

Jekk intom skola li tixtiequ tordnaw il-pupa ta’ Alice fl-Art bla Meravilji, allura l-ewwel ħaġa li għandek tistaqsi lilek innifsek hija:

1. L-istudenti tal-klassi kollha għandhom 14-il sena jew aktar?

Iva? Tajjeb, għax dawn huma l-udjenza li qed infittxu.

2. Il-klassi tiegħek tippreferi tesperjenza dan il-proġett bil-Malti jew bl-Ingliż?

Il-pupi ta’ Alice jiġu f’żewġ tipi, Alice li titkellem bl-Ingliż u Alice li titkellem bil-Malti. L-istruzzjonijiet fil-kaxxa jaqblu wkoll mal-lingwa ta’ Alice li tagħżlu. Għandna 20 pupa disponibbli bil-Malti u 20 pupa disponibbli bl-Ingliż.

3. Il-klassi tiegħi hija maqsuma fi gruppi. Jekk fl-iskola se taslilna pupa waħda, kif se nagħmlu biex li l-istudenti kollha tal-klassi jesperjenzaw l-ispettaklu?

Il-pupa tista’ titnaddaf bħal kull oġġett ieħor li jintuża fl-iskola. L-istruzzjonijiet u oġġetti oħra fil-kaxxa jistgħu wkoll jiġu sanitizzati.

4. Oġġetti? Mela fiex se tikkonsisti l-kaxxa?

Mistoqsija tajba, prosit. Il-pupa tiġi flimkien ma’: Il-pupa uffiċjali Alice fl-Art bla Meravilji, manwal ta’ struzzjoni li jintewa, karti jew leħħiet tal-logħob, u fl-aħħar iżda mhux l-inqas il-USB tal-fenek li fih il-viżwali kollha li ser ikollok bżonn biex tlesti dan it-Teatru DIY.

5. Issa fuq kollox kif nordnaw l-pupa?

Sempliċi, kemm tibgħatu email lil coordinator@ziguzajg.org! Ladarba tagħmel l-ordni tiegħek eventwalment tiġi kkuntattjat sabiex inkunu nistgħu norganizzaw il-kunsinna tal-pupa. Jekk jogħġbok kun żgur li timla l-oqsma kollha meħtieġa kif xieraq.

Alice fl-Art bla Meravilji

Varji Ongoing