Teatru Redifjuxin minn Mejju!

Hawn f’Teatru Malta ddeċidena li nagħmu podcast aħna wkol, u dan se nibdewh dax-xahar stess, f’Mejju! Immarkah fil-kalendarju tiegħek għax ġej Teatru Redifjuxin u qed nippjanaw li ma nżommu xejn lura f’dawn il-podcasts. Immexxi minn Stjanu Debono, l-ewwel serje se tinkludi għadd ta’ intervisti mal-kreattivi li jaħdmu fil-qalba ta’ kull waħda mill-produzzjonijiet li ġejjin hekk kif insegwuhom matul il-vjaġġi tagħhom ta’ R&D.

Isma’ sew u lesti ruħek għax għandna ħafna x’ngħidu!

 

L-AVVIZI: MEJJU 2021

Matul Mejju, Teatru Malta se jkun qed jirrevedi l-applikazzjonijiet tal-Klassi tas-Surmast u jippjana dak li jmiss għall-parteċipanti u għal Cheek by Jowl, li se jospitaw. Dan il-workshop għal parteċipanti adulti ta’ aktar minn 21 sena se jsir Għawdex f’Settembru li ġej u se jkun miftuħ għal prattikanti tat-teatru li diġà jaħdmu fis-settur. Għandna seba’ mitt sena biex nibdew!

Bħalissa qed jinbdew aktar mill-produzzjonijiet li ġejjin tagħna: Manwel Manwel, il-koproduzzjoni tagħna ma’ FCN, li se tiċċelebra ċ-ċentinarju mill-mewt ta’ Manwel Dimech – soċjalist, filosfu, ġurnalist, kittieb, poeta u riformatur soċjali. L-ispettaklu se jittella’ f’Diċembru f’post li għalissa se nżommu mistur, u saħansitra isem id-direttur ta’ dan ix-xogħol se jitħabbar ukoll fil-ġimgħat li ġejjin, bħala l-ewwel mistieden tas-serje podcast ġdida tagħna – Teatru Redifjuxin – pjattaforma ġdida fejn se nkunu qed niffukaw b’mod speċjali fuq il-vjaġġ tagħna fl-R&D tal-2021 kif ukoll suġġetti interessanti oħra li ninsabu ċerti li l-udjenzi tagħna se jsibu divertenti. Kun żgur li tidħol tismagħna!

Il-produzzjoni kontemporanja tagħna tat-teatru biż-żfin għall-2022, Nouveau Riche, ukoll tidħol sew fl-R&D. L-auditions f’April irriżultaw fl-għażla definittiva ta’ żewġ rwoli ewlenin biex issa l-kittieb u direttur Simon Bartolo qed jaħdem mill-qrib mad-direttur tal-moviment Dorian Mallia u l-kollaboraturi Moveo Dance Company biex ifasslu din il-fantasija kemmxejn makabra għall-adulti. Aktar dwar dan fuq is-soċjali tagħna dalwaqt – ibqgħu aġġornati.

Il-proġett Renaissance tal-Konvenzjoni tat-Teatru Ewropew se wkoll se jkollu l-premiere tiegħu dan ix-xahar! Teatru Malta huwa wieħed mit-tnejn u għoxrin teatru tal-Konvenzjoni Ewropea tat-Teatru (ETC), minn 18-il pajjiż Ewropew li qed jieħdu sehem f’dan il-proġett li jieħu mill-filosofija, il-fantasija, u l-pressjoni li qed ngħixu taħtha f’din il-pandemija biex jipproduċi serje oriġinali ta’ films drammatiċi qosra li se jkunu disponibbli biex narawhom id-dar b’xejn. Segwi lil Leah b’għajnejha miftuħin beraħ waqt li tiskopri d-dinja maġika tal-kotba u tiċċelebra l-passjoni tagħha għall-qari u t-teatru.

Fil-film qasir se naraw lil Leah Grech u Ian Moore b’ċinematografija ta’ Karl Andrew Micallef, mużika oriġinali ta’ Yasmin Kuymizakis, u kitba u direzzjoni ta’ Sean Buhagiar. Grazzi ħafna lil Palazzo Falson u lil Guttenberg Press li qed jagħmlu dil-“ħolma” realtà 😉

Agħti daqqa t’għajn lejn it-trailer u ingħaqad magħna hekk kif ngħoddu b’lura lejn il-premier li se jkun fid-9 ta’ Mejju bejn 00:00 u 23:59 CET! Il-film Rinaxximent se jkun disponibbli fid-9 ta’ Mejju għal ġurnata waħda biss u mbagħad kompletament “on demand” mit-Tnejn 24 ta’ Mejju ‘l quddiem mill-website tal-Konvenzjonijiet tat-Teatru Ewropew  

 

Qabel ma nħallukom, nixtiequ wkoll nifirħu lir-rebbieħa ta’ #TislibaTeatru, Jessica Fenech! Wara li bagħtitilna t-tweġibiet korretti tagħha li tistgħu taraw hawn taħt, aħna kuntenti li għamilna kuntatt magħha u nagħtuha l-maskra tal-għajnejn esklussiva tagħna Teatru Malta × SefFarrugia. Nixtiqulha rqad tajjeb u ħolm sabiħ dwar ħafna tislibiet minn issa ’l quddiem!

Għal aktar tagħrif dwar l-iżviluppi l-aktar reċenti kollha tagħna fejn jidħlu l-produzzjonijiet li bħalissa jinsabu f’R&D, inkiteb fin-newsletter tagħna, segwina fuq il-midja soċjali u attenta għall-artikli regolari fuq Encore Magazine.

#TakeOverThursday: Chantelle Micallef Grimaud

🇲🇹 Tħobbu l-bajtar tax-xewk? 😉 Jekk it-tweġiba hija iva, iċċekkja l-midja soċjali tagħna għada għax l-artista tagħna li jmiss biex tieħu f’idejha mhi ħadd ħlief il- ko-direttur artistiku ta’ Prickly Pear Productions, Chantelle Micallef Grimaud. Hija attur, direttur u produttur, ġeneralment issibha tħuf madwar Malta jew ir-Renju Unit. Għada, madankollu, se tidher tħuf madwar id-dar tagħha 😊 Dan se jinvolvi ħafna te 🫖 Zoom u delirju 🤪

Jum Dinji tal-Ktieb 2021

Illum huwa l-Jum Dinji tal-Ktieb!
📚📚
.
Hawnhekk hawn teaser mill-film qasir li lestejna dan l-aħħar bħala parti mill-proġett “Renaissance” tal-ETC, u aqta’ xiex? Rinaxximent ta’ Teatru Malta huwa dwar il-kotba, kotba u aktar kotba!
.
Segwi lil Leah kif jixegħlu għajnejha waqt li tiskopri d-dinja maġika tal-kotba u tiċċelebra l-passjoni tagħha għall-qari f’Mejju li ġej! Għalissa tista’ tgawdi ħarsa ċkejkna lejn dak li lestejna 😊
.
Ara Rinaxximent nhar il-Ħadd 9 ta’ Mejju (għal ġurnata waħda biss) jew mit-Tnejn 24 ta’ Mejju ’l quddiem.
_______________________
Flimkien ma’ Leah Grech & Ian Moore
Ċinematografija ta’ Karl Andrew Micallef
Mużika ta’ Yazmin Kuymizakis
Kirba u Direzzjoni ta’ Sean Buhagiar

Applika għal Nouveau Riche!

Teatru Malta qed tfittex żewġ atturi biex jipparteċipaw fi produzzjoni mfassla ġdida ta’ teatru u żfin — Nouveau Riche — produzzjoni kontemporanja bil-Malti b’kitba u direzzjoni
ta’ Simon Bartolo, koreografija u moviment ta’ Dorian Mallia, b’kollaborazzjoni ma’ Moveo Dance Company. Ir-rappreżentazzjoni għandha l-għan

li ma tkunx itwal minn siegħa u tinkludi kast li jkun fih kemm żeffiena kif ukoll atturi.

Niżżel l-applikazzjoni tiegħek minn hawn taħt!

#TakeOverThursday – Jamie Cardona

Il-mistieden ta’ takeoverthursdays ta’ għada huwa wiċċ familjari imma dan l-aħħar sar leħen familjari ukollb… u did-darba mhux fuq ir-radju biss se nisimgħuh 😉 Lestu ruħkom għax għada se nħallu l-midja soċjali tagħna f’idejn ħadd ħlief l-attur Jamie Cardona! Jiġifieri għandna garanzija ta’ naqra daħk tajba waqt li jmexxina miegħu tul il-ġurnata tiegħu. Titilfuhx!

L-AVVIŻI – APRIL

Ir-Rebbiegħa magħna u xi ħaġa li kulħadd għandu jkun eċċitat dwarha minbarra l-fdal kollu tal-figolli u l-bajd tal-Għid hi l-applikazzjoni għall-edizzjoni ta’ din is-sena għall-Klassi tas-Surmast. Din il-masterclass kellha tiġi posposta s-sena l-oħra minħabba l-pandem– u le uff, aħjar ma nsemmuhiex! Din is-sena nistgħu sa fl-aħħar nikkonfermaw li se nerġgħu norganizzawha, u bil-kbir ukoll għax il-mistednin ta’ unur tagħna m’huma ħadd għajr l-inkomparabbli Declan Donnellan u Nick Ormerod minn Cheek by Jowl!

 

Minn meta twaqqfet fl-1981, Cheek by Jowl stabbilixxiet reputazzjoni internazzjonali li ġabet ħajja friska lill-klassiċi bl-użu ta’ performances intensi u mqanqlin. Il-Masterclass se ssir f’Għawdex u se tkun miftuħa għal għadd limitat ta’ applikanti minħabba r-restrizzjonijiet li jipprojbixxu gruppi kbar. Jekk tinteressak aqbad u żur il-website tagħna biex tiċċekkja l-formola tal-applikazzjoni u tapplika għal din l-opportunità unika qabel ma tiskadi fl-aħħar ta’ dan ix-xahar.

 

Wara li d-Direttur Eżekuttiv tal-Kummissjoni Ewropea tat-Teatru, Heidi Wiley, ħarġet b’aħbar speċjali fil-Jum Dinji tat-Teatru, aħna kuntenti ħafna li nħabbru wkoll min-naħa tagħna, li Teatru Malta se jospita l-edizzjoni tal-2021 tal-Konvenzjoni Ewropea tat-Teatru f’Malta din il-Ħarifa bejn it-28 u l-31 ta’ Ottubru, b’kollaborazzjoni mal-Kunsill Malti għall-Arti, Spazju Kreattiv u t-Teatru Manoel. Apparti li din hi l-ewwel darba għas-settur lokali tagħna li se nospitaw l-ETC fi xtutna, dan ifisser li qed niftħu l-konversazzjoni dwar il-kultura u t-teatru għar-rappreżentanti tat-teatru nazzjonali mill-Ewropa kollha. Din hija wkoll opportunità tad-deheb biex nuru kwalunkwe produzzjonijiet lokali li se jkunu qed iseħħu matul it-28 u l-31 ta’ Ottubru 2021 lill-istess entitajiet kulturali Ewropej, u huwa għalhekk li qed nappellaw lill-pubbliku ġenerali biex jinfurmana bi kwalunkwe pjan biex jittellgħu performances matul dan iż-żmien billi jibgħat email lil contact@teatrumalta.org.mt sabiex ikollkom iċ-ċans li tkunu parti mill-programm ta’ avvenimenti tad-delegati uffiċjali tagħna.

 

F’Marzu ħabbarna wkoll it-titli tal-produzzjonijiet li se nipproduċu s-sena d-dieħla, li kollha bħalissa qed jiġu żviluppati u riċerkati flimkien mal-artisti li jew se jkunu qed jidderieġu, jikkoreografjaw, jiktbu jew jipproduċuhom. It-tim tagħna bħalissa qed jaħdem mill-qrib ħafna mal-artisti kollaboraturi tagħna biex niżguraw li l-wirjiet tas-sena d-dieħla jitlestew mingħajr intoppi. Sinċerament għandna seba’ mitt sena biex naraw dan ix-xogħol kollu jieħu l-ħajja fuq il-palk. Id-deċiżjoni li nidħlu fir-Riċerka u l-Iżvilupp ċertament ma kinitx waħda li għamilna ta’ malajr jew faċilment, kif esprimejna b’mod ċar meta ddikkjarajna pubblikament id-deċiżjoni tagħna x-xahar li għadda. Kull waħda minn dawn il-fażijiet ta’ Riċerka u Żvilupp qed tkun ukoll dokumentata tajjeb ħafna u għalhekk żomm ħarstek fuq il-midja soċjali tagħna biex tara b’għajnejk stess dak li qed jiġri wara l-bibien metaforikament magħluqa tagħna hekk kif tiżvolġi l-bqija ta’ din is-sena. Fil-fatt, pereżempju, f’dawn il-jiem se nkunu qed noħorġu sejħa ta’ awdizzjoni għal waħda minn dawn il-produzzjonijiet u għaldaqstant ibqgħu sintonizzati!

 

Fl-aħħar nett xtaqna nfakkru l-edukaturi kollha biex jiċċekkjaw in-News Break tal- Mede nhar it-Tnejn 19 ta’ April ta’ MEDE għax ser inkunu bgħattna l-links kollha tal-performances tal-edizzjoni ta’ din is-sena ta’ Trikki Trakki. Jekk hemm għalliema li għandhom xi mistoqsijiet nitolbuhom jikkuntattjawna. Insomma, tagħmel x’tagħmel, titlifx li tara lil dawn l-istudenti mimlija talent jegħlbu l-ostakli tal-lockdown f’isem it-teatru u għall-imħabba ta’ #TrikkiTrakki! Dawn il-preżentazzjonijiet huma disponibbli fil-verżjoni sħiħa tagħhom esklussivament għall-iskejjel, madankollu jekk jogħġbok ara l-filmat bil-punti importanti hawn biex idduq tikka mill-festival ta’ din is-sena.

Aġġornamenti mill-laqgħa bejn il-MEIA, TM u ACM.

Ilbieraħ Teatru Malta, il-Kunsill Malti għall-Arti u l-MEIA ltaqgħu biex jiddiskutu r-riżultat ta’ dak li seħħ il-ġimgħa l-oħra. Segwu aktar hawn taħt:

– Il-MEIA (l-Assoċjazzjoni Maltija tal-Arti u l-Industrija tad-Divertiment) u Teatru Malta qablu li l-ispirtu ta’ djalogu u l-libertà tal-espressjoni huma ta’ importanza kbira għal din il-konversazzjoni. Il-MEIA esprimiet tħassib dwar is-sitwazzjoni attwali fis-settur tat-teatru, u enfasizzat il-ħtieġa għal sensittività u konsiderazzjoni.

– Teatru Malta ppropona li jsir stħarriġ professjonali, flimkien ma’ ACM (il-Kunsill Malti għall-Arti), biex jiġu stabbiliti mezzi preferuti ta’ komunikazzjoni mal-pubbliku ġenerali, u l-perċezzjoni pubblika ta’ Teatru Malta u l-programmi tagħha sabiex dan ikun jista’ jsaħħaħ ir-relazzjoni u t-trasparenza tagħha fis-settur.

– Il-MEIA qablet li tqassam dan l-istħarriġ lill-membri tagħha stess, bir-riżultati rispettivi kollha jiġu eventwalment ippubblikati minn Teatru Malta.

– Filwaqt li Teatru Malta u ACM ikomplu jemmnu fid-dritt li jeżerċitaw il-libertà tal-kelma, ġie rrakkomandat mill-MEIA li tiġi abbozzata linja gwida dwar prattika tajba mill-ACM li tiddettalja kif il-PCOs għandhom jimpenjaw ruħhom maċ-ċittadini individwali u l-pubbliku ġenerali.

– Teatru Malta se terġa’ tippubblika r-raġunament wara l-intenzjonijiet tagħha li tiffoka fuq ir-Riċerka u l-Iżvilupp issa, billi tindirizza din il-kjarifika lil kull min hu kkonċernat u interessat.

– Teatru Malta, MEIA u l-Kunsill Malti għall-Arti se jkomplu jaħdmu id f’id bit-tama li jissaħħaħ is-settur.

Ritratt ta’ Lindsey Bahia: Rinoċeronti (2019)

Stejjer Mill-Ġimgħa l-Kbira ma’ Martin Gauci

Fid-dawl tal-kważi-lockdown u l-kanċellazzjoni tal-purċissjonijiet kollha tal-Ġimgħa l-Kbira, aħna rrikorrejna lejn il-produttur tat-teatru, dilettant tad-drammi tal-passjoni u membru tal-Atelier Francis Ebejer, Martin Guaci, sabiex jagħtina ftit informazzjoni dwar it-tradizzjoni tad-drammi tal-passjoni u x-xogħol li jirrikjedi dan. Nisperaw li se tgawdu din l-intervista tagħna ma’ Martin hawn taħt.

Kemm ilek involut fil-produzzjoni tad-drammi tal-passjoni u kemm il-dramm tal-passjoni pproduċejt sissa?

DWAL ĠODDA twaqqfu fl-1970; kellhom bħala l-ewwel “producer” lil Karmenu Aquilina, li b’sogħba ħalliena dan l-aħħar. Bejn l-1972-74, bdew jieħdu sehem fil-konkors tal-Mġarr fejn ġew it-tielet u r-raba’. Mill-1975, L-Għaqda bdiet twaħħal xogħol teatrali mal-purċissjoni bil-vari tradizzjonali tal-Ġimgħa l-Kbira, li f’Ħal Għargħur bdiet isseħħ f’Ħadd il-Palm. Għall-bidu bdiet issir fi 3 taqsimiet: fil-bidu, fin-nofs għal għonq it-triq fi ġnien żdingat, u fi tmiem il-purċissjoni.  Imbagħad, lil hinn minn xi forma ta’ pageant, din inbidlet f’xogħol teatrali impenjattiv f’żewġt atti: fil-bidu u fi tmiem, fejn kollox huwa live, l-atturi jinterzjaw ruħhom fil-purċissjoni u ġieli jirreċtaw tulha wkoll, u fit-tieni att jitwaqqfu l-vari f’nofs il-pjazza qabel jiddaħħlu fil-knisja. Tinfetaħ diskussjoni mal-persunaġġi tradizzjonali tal-vari li jieħdu l-ħajja fuq il-palk.  Jixħtu dawl fuq jekk it-tbatija – bħat-teatru – hija mazza li tkisser jew tonġor. Ingħatajt it-tmexxija tal-Għaqda fl-1979, u tal-produzzjoni tal-Ġimgħa l-Kbira fl-1982. Iżda mill-bidu kont involut fiha: mal-mużika, wara l-kwinti, immexxi l-korus, kitba, produzzjoni ta’ att minnhom. U jseħħ it-tislib, mera tat-tislib ta’ żmienna. Bejn l-1996 u 2003, it-treġija kienet f’idejn marti Theresa iżda bqajt ngħaqqad it-test.

Iddeskrivi l-proċess tat-tħejjija għal dramm tal-passjoni, minn kemm kmieni jibda x-xogħol fuq l-ispettaklu? 

Il-proċess ta’ tħejjija għal kull produzzjoni jibda mill-ewwel fil-Ġimgħa Mqaddsa.  F’dawn l-aħħar snin (s’intendi mhux fil-lockdown tal-2020), saret drawwa li ‘core-group’ minn dawk involuti fil-produzzjoni ta’ dik is-sena, jitilgħu Għawdex, jirreċtaw siltiet mill-produzzjoni ta’ Ħadd il-Palm nhar il-Ġimgħa l-Kbira f’xi kappella għal udjenza magħżula fil-funzjoni tradizzjonali tal-adorazzjoni tas-salib.  U dlonk jitnidew post-mortem u diskussjoni lejn fejn u kif se jterrqu d-DWAL ĠODDA lil hinn. Ħsibijiet, diskussjonijiet, smigħ ta’ programmi jew xi biċċa mużika, xi film ‘iebes jew aħrax’ … U hekk jibda jinhema kollox sa ma … 

Sal-Milied, hu u jitwieled HU, id-DWAL ĠODDA jkunu qed iħokku rashom kif se jsallbuh. Jintrama l-palk fis-Sala Parrokkjali u lejn l-aħħar ta’ Jannar jibda proċess ta’ 10 gimgħat ta’ rehearsals.  Nhar it-Tlieta u l-Erbgħa ta’ qabel Ħadd il-Palm isiru żewġ rappreżentazzjonijiet ġewwa, għal udjenza magħżula u dawk li ma jifilħux joqogħdu bilwieqfa.  U tibda maratona biex jiżżarma l-palk u jintrama rżin tul iz-zuntier sakemm nhar il-Palm Ħal Għargħur ikun ‘tal-festa’.

DWAL ĠODDA ġie kkreditat li pproduċa teatru innovattiv”. Xjagħmel id-drammi tal-passjoni tiegħek innovattivi? 

L-ewwelnett għax nitilqu mit-tradizzjoni u l-paraliturgija ta’ purċissjoni għażiża tul snin twal għall-poplu Malti: dik tal-Ġimgħa l-Kbira; imbagħad għax nimirħu lil hinn ħalli naraw l-attwalità tagħha għal żminijietna. Eżempju: indagajna kif jidħlu fil-Ġimgħa l-Kbira ta’ żminijietna, persunaġġi bħal Jitzak Rabin, l-arċisqof Romero, Madre Theresa; jerga’ nagħmlu ħilitna biex nuru kif il-persunaġġi tradizzjonali tal-Ġimgħa l-Kbira (il-Madonna, Ġwanni, il-Madalena, Pilatu u martu u oħrajn għandhom x’jgħidu lill-bniedem post-modern.  (fl-2020 kellha tidħol Malala.)

Din se tkun it-tieni sena li sfortunatament kellek tħassar id-dramm tal-passjoni tant mistenni li normalment iseħħ nhar il-Ħadd il-Palm f’Ħal Għargħur. Dan xi jfisser għalik u għat-troupe tad-drama tiegħek? 

Aħna u niltaqgħu biex nibnu dokumentarju: 50 sena f’50 minuta, il-kelma ewlenija li spiss ittenniet kienet ‘familja’.  U kif tista’ familja tħossha komda meta ma tiltaqax jew tiltaqa’ biss virtwalment???!!  Minkejja li xorta nippruvaw inżommu l-kuntatt ma’ xulxin u nkunu għal xulxin ta’ spalla li fuqha dak li jkun jista’ jnewwaħ, qed inħossu n-nuqqas ta’ kuntant fiżiku: li kien jibda ħin qabel ir-rehearsals, waqthom, u wara meta ndumu niddiskutu, ġieli sas-2.00 am.  Il-kitla tal-kafè dejjem kienet għalina sors ta’ mirakli, u dejjem kellna xi ħaġa x’imeximxu: kemm għall-ġisem kif ukoll għar-ruħ għatxana.

Dawl Ġodda twaqqfet fl-1970 u dan l-aħħar iċċelebrat il-50 anniversarju. Kif irnexxielek tfakkar dan l-avventiment waqt il-pandemija?

Billi bżajna għal saħħet xulxin u l-familji tagħna hekk li b’maturità ddeċidejna li ma niltaqgħux fis-Sala Parrokkjali fejn għandna s-sede tagħna għajr f’numru żgħir hafna skont id-direttivi tal-awtorijiet tas-saħħa.  Billi għamilna ħilitna biex inkunu ta’ fejda ta’ xulxin f’waqtiet diffiċli. Qed inħejju dokumentarju (ara 4 – wasal fil-fażi tal-infinar), u intervistajna saħansitra nies li segwewna tul dawn l-aħħar snin (ħbieb, ex-membri, Paul Xuereb, Carmen Azzopardi, Profs. Vicki Cremona). Dan kellu jkun interzjat ma’ produzzjoni ta’ Novembru li għadda li fiha nġibu flimkien fuq il-palk karattri li jfakkru fi produzzjonijiet imgħoddija: Caravaggio, dak li jfittex fil-laned taż-żibel; dik li dejjem xtaqet taħdem tal-mara ta’ Pilatu iżda qatt ma tawhielha, u meta tawhielha tħassret il-produzzjoni (x’ironija!!) kif tħassret il-produzzjoni Deheb (l-isem jitkellem waħdu) tal-2020, kif ukoll tal-2021.  Barra minn hekk is-sala ntużat (għallinqas) biex fiha jinġabru ħwejjeġ u uniformijiet għal skejjel fil-Kenja. Ippruvajna nħejju serje ta’ one-actor plays għal li jista’ jkun; Kellna nagħmlu dramm mal-quddiesa ta’ nofs il-lejl tal-Milied 2020, fil-kappella ta’ Marsalforn Għawdex. Iżda…

Fl-aħħarnett, xhemm fit-triq għal DWAL ĠODDA ladarba tintemm din il-pandemija?

Din ma nazzardax inweġibha. Ukoll biex qed nikteb dan inħoss bħal qrusa. Għandi armajn 67 sena; laqgħetni fi ħdanha għaqda li għent biex titwaqqaf u flimkien il-membri taw armajn 500 produzzjoni. Jista’ jkun li l-mixja mimlija sħab. Wieħed tampari qalli “jeħtieġ nirransenjaw ruħna li se jkunu ta’ warajna li se jerġgħu jibdew jagħmlu teatru.”  Irridu nibqgħu nemmnu li s-sens ta’ familja għadu qawwi; u jekk familja tkun magħquda tista’ tiġġedded u twettaq ħwejjeġ kbar; għax it-teatru jibqa’ għodda tajba għal dil-familja: mazza li tonġor mhux tkisser.

Barra minn hekk b’idejna fuq żaqqna ma qgħadniex: ħejjejna serje ta’ programmi għar-radju:  Il-Via Sagra fi żmienna.  Dawn se jixxandru tul il-Ġimgħa Mqaddsa, fuq Net FM u One Radio f’forom differenti bi tweġiba għas-sejħa tal-President ta’ Malta għall-Għaqda Nazzjonali.  Kollox ma’ kollox, jekk kollox jgħaddi, imma dak li hu minqux fil-moħħ u l-qalb ta’ dawk li missew mal-Ġimgħa l-Kbira jew id-DWAL ĠODDA f’Ħal Għargħur, dak ma jitħassarx u ma jinsteraq qatt … u jibqa’ jhenni lil dak li jkun, l-iktar meta jpoġġi rasu fuq l-imħadda b’tama li joħlom sabiħ. Jgħaddi mill-kurdun ambiliku u jmewweġ lejn il-ġenerazzjonijiet li ġejjin.  Hekk :  n i t t a m a w.  

Nippreżentaw lil Cheek by Jowl!

Wara li s-sena l-oħra pposponejna l-Klassi tas-Surmast minħabba l-pandemija, din is-sena nistgħu finalment nikkonfermaw li wasalna lura bil-kbir dis-sena għax il-mistednin tagħna m’huma ħadd ħlief il-kbar Declan Donnellan u Nick Ormerod ta’

Cheek by Jowl

💜🧡

Minn meta twaqqfet fl-1981, il-kumpanija Cheek by Jowl stabbilixxiet reputazzjoni internazzjonali biex iġġib ħajja friska lill-klassiċi bl-użu ta’ wirjiet intensi u strambi, allura ħejji ruħek għal masterclass mimlija azzjoni li żgur m’għandekx titlef!
Interessata? Mela niżżel l-applikazzjonijiet #KTS minn hawn u applika issa biex tifforma parti mill-masterclass tas-sajf tagħna